Соторутааҕыта Саха сиринээҕи Ырыаны айааччылар сойуустара, мелодистар СӨ Ил Дархана Егор Борисовка өрөспүүбүлүкэҕэ Ырыа Күнүн олохтуурга ыҥырыы суругу суруйбуттара. Саха сиригэр Ырыа Күнэ 2013 сылтан саҕалаан, үүммүт 2017 сылга бэһис төгүлүн ыытыллыаҕа. Ол устатын тухары Ырыа Күнүн суолтатын туһунан үгүс тэрээһиннэр ыытылыннылар, санаалар, анаарыылар этилиннилэр, ырыа-хоһоон айылынна, кинигэлэр таҕыстылар. Онон дьон-сэргэ бу уопсастыбаннай хамсааһыҥҥа кыттыһан, Ырыа Күнүгэр баҕа санаата күүһүрэн иһэр. Ити бэлиэ КҮНҮ көрсө Ырыа айааччылар сойуустара өрөспүүбүлүкэбитигэр Ырыа Күнэ баар буоларын туруорсан, аһаҕас куолас хомуурун биллэрдилэр. “Бу дьоһун суолталаах хамсааһыҥҥа Сахабыт сирин ырыа куттаах бар дьонун кыттыһаргытыгар ыҥырабыт, эрэнэбит”, — дииллэр ырыа айааччылар.
Куоластааһыҥҥа киһи бэйэтин аатын-суолун, төрөөбүт күнүн, сылын, олорор сирин аадырыһын толору суруйара, илии баттыыра ирдэнэр. Куолаһы хомуйуу олунньу 15 күнүгэр түмүктэнэр. Онон, күндү биир дойдулаахтарбыт, ырыаны таптааччылар, санааҕытын биллэриҥ, куоласкытын холбооҥ!
Тэрийэр хамыыһыйа. Ырыа айааччылар сойуустара.
тел: 8914-226-43-99 А. В. Егоров, 8924-165-95-04
С. И. Васильев. эл почта: step56@ro.ru
“Дьүһүй” сахалыы ырыа кулууба – 8 914 223 98 10 Луҥха Өлөксөй, эл почта: lunxa@bk.ru