Ис дууһаларыттан ыллаабыттара буолуо дуо?
Хаҥалас улууһун Покровскай куорат үөрэнээччилэрин хора «Катюша» ырыаны ыллыы турдаҕына, биир кыттааччы уҥан түспүтүн устубут видеолара тарҕанна. Видеоҕа көстөрүнэн, алтыс кылаас үөрэнээччитэ ыллыы туран доруобуйатын туруга мөлтөөн эрэрин сэрэйбит курдук, иннигэр турар уолу сыҕарытан, хортан таска тахса сатыыр да, кирилиэс үктэлигэр охтон түһээхтиир. Дьолго, көмө суһаллык оҥоһуллан, уол билигин этэҥҥэ.
Ол эрээри, бу видеоны көрө олорон киһи биир суолтан мунаарар. Ол сиэр-майгы өттүнэн ыллахха, биир саастыылаахтарыгар, доҕордоругар ыксаллаах кэм суоһаабытыгар туох да буолбатаҕын курдук, ыллыы тураллара, мин санаабар, олуонатык көстөр. Буолаары буолан, «Катюша» ырыаны! Харахпар «А зори здесь тихие» киинэҕэ бүтэһик кэриэтэ хаалбыт саллаат кыыс барахсан (артыыска Ольга Остроумова) бу ырыанан доҕуһуолланан өлөртөн да куттамматах эпизода көстөн кэллэ… Биллэн турар, Хаҥалас улууһун үөрэхтээһиҥҥэ управлениетын начальнигын э.т. эппитинии, ырыаны тохтоппуттара буоллар, ыһыллыы-тоҕуллуу барыа, мэһэйи үөскэтиэ этилэр. Өссө төһөлөөх оҕо сотовайга түһэриэ эбитэ буолла?
Ол гынан баран, бу түгэҥҥэ оҕолорбутугар атын киһи алдьархайыгар кыһаллыбат таас сүрэхтээх буолуу «кыымын сахпатыбыт» дуо? Киһи хайдах киһи буола улаатара кыраттан да саҕаланар эбээт. Оҕолор барахсаттар ити кэмҥэ ис дууһаларыттан туран ыллаабыттарын саарбахтыыбын. Ама, кинилэргэ «ырыа ыллаабыт да иһин ынчык буолан иһиллибэтэҕэ» буолуо дуо?
Мин санаабар, хор оҕолорун ыһан кэбиспэккэ, саатар ырыаны тохтотуохха сөп этэ.
Надежда ЕГОРОВА, edersaas.ru