2015 сыл алтынньытыгар Бразилияҕа Төрүт норуоттар аан дойдутааҕы оонньуулара аан бастаан ыытыллыбыта. edersaas.ru
Онно Саха сириттэн эстрада чаҕылхай сулуһа Екатерина Саввинова-Саина кыттыбыта. Быйыл бу тэрээһин аны Канадаҕа иккис төгүлүн ыытылынна. Онно Саина эмиэ кытынна.
Саха ырыаһыта Бразилия норуотун улуу сирдьитин Маркос Теренныын уруккуттан билсэр дьон быһыытынынан олус истиҥник көрүстүлэр.
— Бу тэрээһиҥҥэ спортивнай уонна култуурунай хайысхалаах күрэхтэһиилэр ыытыллар буолан, араас омук бэрэстэбиитэллэрэ олус көхтөөхтүк кытталлар.
Ону ааһан, бу норуоттар сомоҕолоһууларын биир чаҕылхай туоһута. Дьэ, манна баар аан дойду төрүт норуоттарын үгэһин ытыска ууран биэрии!
Бу тэрээһини ыытар туһунан боппуруос Холбоһуктаах нацияларыгар тэрилтэлэригэр хас да төгүл дьүүллэһиллэн, ырытыллан баран олоххо киирбитэ. Манна ЮНЕСКО уонна Аан дойдутааҕы Олимпийскай кэмитиэттэр эмиэ кыттыыны ылбыттара.
Үгүс үлэни Канада индеецтэрин сирдьитэ Вилли Литлчайд уонна Бразилия индеецтэрин сирдьитэ Маркос Терена ыыппыттара.
Кинилэр сүүрэн-көтөн маннык тэрээһин ыытыллар буолбута, — диэн кэпсиир Саина.
Оттон биһиги эстрада чаҕылхай сулуһа Екатерина Саввинова-Саина Төрүт норуоттар аан дойдутааҕы оонньууларыгар төрөөбүт Сахатын сирин дорҕоонноохтук ааттата сылдьарынан киэн туттабыт!
Елена ПОТОЦКАЯ, «Саха сирэ» хаһыат, edersaas.ru