Ытык Күөл сэлиэнньэтин килбэйэр киинигэр П.А.Ойуунускай аатынан уулуссаҕа оҕо уһуйаанын икки таас дьиэтэ тэҥинэн тутулла турар. Балартан кырата – тимир каркастаах, арболит дьиэ. Манна “Сулусчаан” оҕо саадын 50 иитиллээччитэ сылдьыаҕа.
Таатта улууһугар тутуу үлэтин дьаһайар муниципальнай хааһына тэрилтэтин дириэктэрэ Анна Иванова билиһиннэрбитинэн, бу эбийиэк муниципальнай оройуон сакааһынан “Сахам сирэ – XXI үйэҕэ” үтүө дьыала дириэксийэтэ үбүлээн тутуллар, тутуу үлэтин улуус бэйэтэ хонтуруоллуур. Куонкуруска Чурапчыттан Константин Лебедев салайааччылаах “Алаас” ХЭУо кыайан бэдэрээттэһэн тута сылдьар. Үлэһиттэрэ – таджиктар. Кинилэр үлэлэрин эдэр прораб Иван Флегонтов сүрүннээн биэрэр.
Бу күннэргэ дьиэ көҥдөйүн тутан бүтэрбиттэр. Ол гынан баран, Анна Константиновна этэринэн, соторутааҕыта сакаасчыты уларытаннар, тутуу хаамыыта бытаарар, тардыллар чинчилээх. Онон быйылгы кыстыкка Ытык Күөл «сулусчааннара» саҥа дьиэҕэ киирэллэрэ-киирбэттэрэ чуолкайа биллибэт.
Василий НИКИФОРОВ, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриилэрэ.