Тааттаҕа араас омуктартан турар биригээдэ Тутааччы күнүн пловунан бэлиэтиэҕэ
Төһө даҕаны кириисис тыына ыган сорох эбийиэктэр “тоҥоруллан” турдаллар, Таатта улууһугар тутуу үлэтэ оргуйан олорор. Ону улуус киинигэр, Ытык Күөл сэлиэнньэтигэр, кырачааннар уһуйааннарыгар аналлаах икки таас дьиэ биир киин уулуссаҕа тэҥинэн тутулла тураллара туоһулуур.
Олортон саамай баараҕайдара, көстүүлээхтэрэ – 140 миэстэлээх оҕо саадын уораҕайа. Бу 1729 кв. миэтэрэ иэннээх эбийиэк тутуутун Яков Ефимов салайааччылаах “Северный дом” ХЭУо тутуу хампаанньата былырыын муус устарга таас-тимир атахтарын түһэрэн саҕалаабыт уонна быйыл ахсынньыга үлэҕэ туттарыахтаах. Көҥдөйө бүтэн, ис-тас үлэтэ хаалбыт.
Прораб, Ньурба уола Антон Уваров билиһиннэрэринэн, үлэ график быһыытынан баран иһэр. Тутуу хампаанньата эбийиэккэ генеральнай бэдэрээччитин сэргэ сакаасчыт оруолун эмиэ толорор эбит. Тоҕо диэтэххэ, бу оҕо саада судаарыстыба-чааһынай бииргэ үлэлээһинин ньыматынан тутуллар: “Алмаасэргиэнбаан” кирэдьиит биэрэр, “Северный дом” тутар, онтон судаарыстыба сыыйа төлөһөн ылыахтаах. Инньэ гынан, бэрэбиэркэҕэ-хонтуруолга тардыллан, үп-харчы хамсааһына бытаардар даҕаны, хамнаһы ыйдааҕынан сабан иһэллэр.
Антон тутуу инженерэ идэлээх, 2011 сыллаахха үөрэҕин бүтэриэҕиттэн үлэлиир эбит. “Хас даҕаны улахан эбийиэккэ үлэлэстим гынан баран, сирэй эппиэтинэспэр ылыммыт бастакы тутуум”, — диир эдэр прораб. Бу улахан эбийиэк сметата 200-чэ мөл. солкуобайдаах. Суббэдэрээккэ билигин 30-ча киһи үлэлии сылдьар. Дьокуускайтан хайысха-хайысханан идэтийбит тэрилтэлэртэн кэлбиттэр: ким — электрикаҕа, ким – сантехникаҕа, ким – вентиляцияҕа. Өрүү буоларын курдук, сыбах өттүгэр күннээх Таджикистан уолаттара, кырыыһатын уонна эркинин бүрүйүүгэ олохтоох биригээдэлэр үлэлииллэр. Ити иһигэр Баайаҕа таас оскуолатын тутууга сылдьыбыт уолаттар эмиэ бааллар.
Александр Николаевичтан Тутааччы күнүн хайдах бэлиэтииллэрин ыйыппыппар: “Плов астаан сиэхпит”, — диэн сэмэйдик хоруйдаата. Ол интернациональнай хамаандаҕа сөптөөх быһаарыы буолуо: манна саха, киргиз, таджик, осетин биир иллээх дьиэ кэргэн буолан үлэлииллэр. Кинилэр соруктара эмиэ биир: Ытык Күөл кырачааннарыгар сылаас, сырдык, үйэлээх дыбарыаһы Саҥа дьылы көрсө бэлэх туттарыы.
Василий НИКИФОРОВ, «Саха сирэ» хаһыат, edersaas.ru .
Мария ВАСИЛЬЕВА (СИА) хаартыскаҕа түһэриилэрэ.