Дьокуускай куорат 385 сылыгар анаммыт үбүлүөйдээх бырааһынньык «Таптал, дьиэ кэргэн уонна бэриниилээх буолуу» девиһинэн ыытылынна. edersaas.ru
Ол да иһин, Ленин болуоссатыгар буолбут бырааһынньыкка улахан болҕомто эдэр ыаллары уонна үйэ аҥаарыттан ордук кэмҥэ бииргэ олорбут ытык ыаллары чиэстээһиҥҥэ уурулунна.
Быйыл, куорат 385 сылыгар, олохторун холбообут эдэр ыаллары куорат олохтоохторо истиҥник эҕэрдэлээтилэр.
Кинилэри: Анисия уонна Григорий Герасимовтары, Анисия уонна Артем Копыловтары, Варвара уонна Иннокентий Сивцевтэри, Анна уонна Алдан Баишевтары, Екатерина уонна Александр Кириллиннэри, Алена уонна Николай Маликовтары, Мария уонна Сергей Расторгуевтары, Татьяна уонна Владислав Тименцевтэри, Галина уонна Александр Игнатьевтары дохсун ытыс тыаһынан көрүстүлэр, истиҥ мичээрдэрин кинилэргэ анаатылар.
Куорат күнүгэр үбүлүөйдээх ытык кырдьаҕастары, кыһыл, бриллиант уонна изумруд сыбаайбалаахтары дьоҥҥо-сэргэ билиһиннэрии уонна эҕэрдэлээһин үтүө үгэскэ кубулуйда. Ол курдук, бүгүн Анна Федоровна Илья Гаврильевич Федоровтар, Анна Алексеевна уонна Иван Сергеевич Лукиннар, Дария Григорьевна уонна Илья Прокопьевич Бугаевтар, Любовь Петровна уонна Николай Семенович Скрыбыкиннар, Мария Егоровна уонна Николай Маркович Сантаевтар, Алевтина Петровна уонна Николай Иванович Шуляковтар, Галина Ивановна уонна Александр Парфеньевич Самсоновтар, Октябрина Николаевна уонна Дмитрий Ильич Пуховтар, Нина Константиновна уонна Петр Михайлович Павловтар куорат 385 сылынан чиэстэннилэр.
11 оҕо төрөөтө
Олоҕу олорбут, дьон сэргэ биһирэбилин ылбыт бу ыаллар үтүө сүбэлэрэ, ытык тыллара эдэрдэргэ алгыс тэҥэ буолбута саарбаҕа суох. Куорат инники сайдыытын кинилэр күн сиригэр көрдөрөр оҕолоро түстүөхтэрэ турдаҕа. Ону кэрэһилээн, үбүлүөйдээх куоракка сэттэ уол уонна түөрт кыыс оҕо (сарсыарда 11 чаастааҕы чахчынан) күн сирин көрдө. Кинилэр ортолоругар игирэ оҕолор бааллар.
Надежда ЕГОРОВА, «Саха сирэ» хаһыат, edersaas.ru