От ыйын 6-8 күннэригэр Дьокуускайга “Олоҥхо дойдутугар —аан дойду норуоттарын эпостара” II Норуоттар икки ардыларынааҕы эпическэй форум ыытыллар.
Бу, биһиги өрөспүүбүлүкэбитигэр иккис төгүлүн буолар улахан, чаҕылхай култуурунай тэрээһин аан дойду чулуу эпосоведтарын, учуонайдарын, эпическэй айымньылары бастыҥ толорооччулары түмүөҕэ. Россия регионнарын уонна араас омук дойдуларын айар интеллигенциялара дискуссионнай былаһааккаларга көрсүөхтэрэ, санаа атастаһыахтара.
От ыйын 6 күнүгэр күнүс 15 чаастан Эркээни хочотугар, “Орто Дойду”-га буолар Форуму үөрүүлээхтик аһыыга ЮНЕСКО Генеральнай дириэктэрэ Ирина Бокова кыттыаҕа итиэннэ бу улахан түһүлгэҕэ РФ ЮНЕСКО Дьыалаларыгар хамыыһыйатын эппиэттиир сэкирэтээрэ Григорий Орджоникидзе кэлэрэ былааннанар.
Бу форум чэрчитинэн “Эпическое наследие народов мира: традиции и этническая специфика” III норуоттар икки ардыларынааҕы научнай кэмпириэнсийэ уонна “Олоҥхо дойдутун ыҥырыытынан” эпоһы толорооччулар II норуоттар икки ардыларынааҕы бэстибээллэрэ ыытыллыахтара.
Маны таһынан, форум кыттыылаахтарыгар уонна ыалдьыттарыгар анаан бу күннэргэ маастар-кылаастар, семинардар, лекциялар, быыстапкалар тэриллиэхтэрэ. Улахан болҕомтону, үгэс быһыытынан, форум култуурунай бырагыраамата ылыаҕа.
Бэҕэһээ буолбут пресс-конференцияҕа СӨ Култууратын, духуобунай сайдыытын миниистирин I солбуйааччы Владислав Левочкин форум үлэтин билиһиннэрдэ.
—“Олоҥхо дойдутугар —аан дойду норуоттарын эпостара” II Норуоттар икки ардыларынааҕы эпическэй форумҥа Россия араас регионнарыттан, Алтайтан, Тываттан, Калмыкияттан, Кыргызстантан, Монголияттан итиэннэ АХШ-тан, Великобританияттан, Канадаттан, Кытайтан, Турцияттан, Молдоваттан, Таджикистантан, Узбекистантан, Казахстантан, Арменияттан, Азербайджантан, о.д.а. сирдэртэн тиийэ бөдөҥ учуонайдар, эпоһы толорооччулар кэлиэхтэрэ. Оттон Ирина Бокова, кини Болгарияттан төрүттээх, Санкт-Петербурга сылдьыытын кэнниттэн Россияҕа бу иккис кэлиитэ буолар. Кини, ЮНЕСКО шедеврэ “Өлүөнэ очуостара” айылҕа пааркатын араҥаччылыырга, харыстыырга туох үлэ барарын итиэннэ саҥа бырайыактары билсиэҕэ, — диэтэ Владислав Левочкин.
ХИФУ Олоҥхо институтун дириэктэри наукаҕа солбуйааччыта Руслан Анисимов, быйылгы кэмпириэнсийэҕэ РФ 22 регионуттан, ол иһигэр Москваттан, Санкт-Петербуртан, Новосибирскайтан, Бурятияттан, Коми, Мордовия Өрөспүүбүлүкэлэриттэн уонна 15 араас дойдулартан, уопсайа, 170-ча биллиилээх эпосоведтар, учуонайдар кэлэллэр диэтэ итиэннэ бу тэрээһин чэрчитинэн, саха учуонайдара кыттыылаах тахсыбыт “GIALens” Америка сурунаалын сүрэхтэниитэ, “төгүрүк остуоллар” ыытыллыахтарын бэлиэтээтэ.
Форум иккис түһүмэҕэр “Олоҥхо дойдутун ыҥырыытынан” эпоһы толорооччулар II норуоттар икки ардыларынааҕы бэстибээллэрин туһунан сиһилии “Арчы дьиэтэ” Духуобунай киин дириэктэрэ, бэстибээли тэрийээччилэртэн биирдэстэрэ, дьүүллүүр сүбэ чилиэнэ Валентина Бочонина кэпсээтэ. Бэстибээлгэ 30 араас омук эпоһын толорооччулар кыттыахтара. От ыйын 8 күнүгэр Арчы дьиэтигэр сарсыарда 09:30 чаастан куонкурус кыттыылаахтарын истии саҕаланыаҕа, онтон 16 чааска түмүк таһаарыыта, кыайыылаахтары наҕараадалааһын буолуоҕа.
Биһиги өрөспүүбүлүкэбит, туох да диэбит иһин, киин сирдэртэн ыраах, хоту сытар регион буолар, оттон маннык бөдөҥ, киэҥ хабааннаах чаҕылхай тэрээһиннэр олоҕу инники хамсаталлар, дьон өйүн-санаатын сайыннараллар.
Татьяна МАРКОВА, “Саха сирэ” хаһыат, edersaas.ru