Бүгүн Ил Дархан Егор Борисов РФ президенин Уһук Илин регионнарга бэрэстэбиитэлэ Юрий Трутневы кытары Нерюнгри оройуонугар Денисовскайдааҕы хайа-байытар кэмбинээккэ сырытта.
edersaas.ru
Санатан эттэххэ, бу кэмбинээт “Соҕуруу Саха сирэ” урутаан сайдар сир резиденэ буолар. Бырайыак былырыын РФ бырабыыталыстыбатынан бигэргэммитэ. Тутуу өссө 2004 с. саҕаламмыта. Былаан быһыытынан, эһиил саас кулун тутарга үлэҕэ киириэхтээх. Бырайыак чэрчитинэн, икки шахта уонна фабрика тутуллуохтаах. Билигин бу тутуулартан Денисовскай шахта үлэҕэ киирэн турар. Сылга икки мөл. тонна таас чоҕу хостуохтаах. Ону таһынан “Подручейнай” диэн чоҕу аһаҕас ньыманан хостуур сир аһыллыбыта. Мантан 500 тыһ. тоннаны ылар былааннаахтар. Кэмбинээт сүрүн куорпуһа оҥоһуллан бүтэн, билигин тутааччылар технологическэй оборудованиелары туруора сылдьаллар.
Юрий Трутнев сарсыарда Денисовскайдааҕы кэмбинээти көрөн баран, эбиэттэн киэһэ мунньах ыытта. Сүрүн дакылааты Уһук Илин регионнар сайдыыларын миниистирин солбуйааччы Александр Осипов оҥордо. Ону сэргэ, үлэ-хамнас туһунан “Колмар” хампаанньа генеральнай дириэктэрэ Сергей Цивилев иһитиннэрдэ.
Юрий Петрович, былаан быһыытынан, сарсын “Россия – мин историям” диэн мультимедийнай паарка аһыллыытыгар кыттыахтаах.
Ыспыраапка: “Денисовскай” хайа-байытар кэмбинээккэ уопсайа сылга 6 мөл. тонна таас чоҕу хостуохтаахтар, ону сэргэ урууданы байытан 4 мөл. тонна кытаанах оттугу (коксаламмыт концентраты) ылҕаан ылыахтаахтар. “Колмар” бу бырайыагын олоххо толору киллэрдэҕинэ, Россияҕа, ону ааһан аан дойдуга бастыҥнар кэккэлэригэр киирэр кыахтанар. Кэмбинээт үлэлээн бардаҕына, уопсайа 1200 киһи үлэлиэхтээх.
Маны сэргэ, “Колмар” Инаглинскайдааҕы хайа-байытар кэмбинээти тута сылдьар. Бу бырайыак чэрчитинэн, сылга 12 мөл. тонна таас чоҕу хостуур санаалаахтар. Тутуу эһиилги сыл бүтүүтэ үлэҕэ киириэхтээх.
Аграфена КУЗЬМИНА, “Саха сирэ” хаһыат, edersaas.ru