Зарина Копырина “Этигэн Хомуска” кыттыаҕа

Бөлөххө киир:

Москваҕа олорор биир дойдулаахпыт, ырыаһыт, «Olox» бөлөх солиһа Зарина Копырина «AAN ALAXCHYN» диэн ырыата “Этигэн Хомус» бириэмийэҕэ “Ураты сүүрээн” номинацияҕа киирдэ.
Ангелина Васильева, “Саха сирэ” хаһыат, edersaas.ru

Зарина “Этигэн Хомус” кэнсиэригэр кэлиэ дуо? Кэнники кэмҥэ ханнык бырайыакка ылсан үлэлэһэ сылдьар? Ону билээри, киниэхэ бэйэтигэр эрийэ сырыттыбыт.
Олунньу 22 күнүгэр Дьокуускайга көтөн тиийиэхтээхпит. Ох курдук оҥостон, кынаппытын куурдан, “Этигэн Хомуска” тиийээри бэлэмнэнэ сылдьабыт. Улахан баҕайы барабааннардаахпыт, онтубутун илдьэ тиийэн, Андреас оонньуурун иһитиннэриэхпин наһаа баҕарабын. Уопсайынан, сөмөлүөтүнэн тиэйии-таһыы сатаннаҕына, инструменнарбытын барытын илдьэ барыахпыт уонна тугу сатыырбытын көрдөрүөхпүт диэн эрэнэбин.
Истэн баран, наһаа үөрбүтүм… Биһиги муусукабытын сахам дьоно истиэ диэн үөрдүм, долгуйдум. “Этигэн Хомуһу” урут устудьуоннуу сылдьан наар истэр, сэргиир, “кыттыбыт киһи” дии саныыр этим. Ол кэмим кэллэ. Бу кэлэрбитигэр куруук күүс-көмө буолар дойдум – Уус Алдан улууһун дьаһалтата көмөлөһүөхтээх. Түгэнинэн туһанан, улахан махталбын тиэрдэбин: баһылык Алексей Федотовка, култуура отделын начаалынньыга Иннокентий Аммосовка уонна Геннадий Васильевка.

Билигин Андреастыын табыллан айа-тута, үлэлии сылдьабыт. Бэйэбит кыра студиялаахпыт. Күн аайы эрэпэтииссийэлиибит. Билигин 12 тректээх иккис альбоммутун бэлэмниибит. Быйыл таһаарыахпыт. Бу альбомҥа сахалыы уонна английскайдыы ыллыыбын. Нууччалыы биир эрэ ырыа киириэҕэ. Ол аата омуктарга уонна саха дьонугар анаммыт муусука буолар. Сүрүннээн, ыччакка анаммыт, тэтимнээх ырыалар. Биһиги бырайыакпыт концепцията – айылҕаны харыстааһын уонна аан дойдуга буола турар тыын боппуруостарга, кыһалҕаларга бэйэбит санааларбыт, — диэн Зарина кэпсээтэ.

Зарина Москваҕа «Будда бар» резиденинэн буолар, сольнай кэнсиэртэри тэрийэр. Париж, Ним, Люнвиль, Бретань, Страсбург, Варшава куораттарга сольнай кэнсиэртэрэ буолбуттара. Россия куораттарынан гостуруоллуур.

Кини X-Faktor (Варшава), «Американский жених» (Майами) музыкальнай уонна тэлэбиидэнньэ шоуларыгар кыттыбыта, «Шаманы мира» документальнай киинэҕэ уһуллубута. Францияҕа “Музыка саха в горах Юра» альбом устан, «За сохранение эпоса Олонхо — нематериального шедевра ЮНЕСКО» грант ылбыта. Russia World Music Awards этническэй музыкальнай бириэмийэ номинана.
Кини муусукатын, ырыатын түҥ былыргы кэмтэн кэлбит дорҕоону, айылҕа тыаһын-ууһун кытта аныгы электроннай музыка дьүөрэлэһиитэ диэн сыаналыыллар.

«Olox» бөлөххө иккиэлэр. Андреас Джонс – талааннаах мусукаан, sound-продюсер уонна бары музыкальнай инструменнарга оонньуур мультиинструменталист. Россия эстрадатын артыыстарын (Полина Гриффис, Александр Рева, Алексей Чумаков, Алексей Лихницкий, Баста, Таис Урумидис, Кимберли Девиз) кытта үлэлээбитэ.

Ангелина Васильева, “Саха сирэ” хаһыат, edersaas.ru

Хаартыскалар: Зарина соц.ситимҥэ страницатыттан.

+1
0
+1
0
+1
0
+1
0
+1
0
+1
0
+1
0