«Жатай» куораттааҕы уокуругун ыҥырыытыгар олоҕуран, жатайдар ититии төлөбүрүн мантан инньэ кыстык кэмигэр эрэ төлүүр буолуохтара. Туһаннаах быһаарыныыны от ыйын 27 күнүгэр СӨ бырабыыталыстыбатыгар ыытыллыбыт сүбэ-мунньахха ылыннылар.
Дьиэ-уот, коммунальнай хаһаайыстыба уонна энергетика миниистирэ Гаврил Левин бэлиэтээбитинэн, ититии төлөбүрэ тэҥ кээмэйинэн сыл устата быһыллан турар. Ол эрээри ханнык баҕарар муниципальнай оройуон алтынньы 1 күнүгэр диэри коммунальнай өҥө төлөбүрүн уларытыыга бэйэлэрин этиилэрин киллэриэхтэрин сөп.
Жатай бөһүөлэгэр 2014 сылтан саҕалаан сылааһы, итии-тымныы ууну, уоту туһаныы төлөбүрэ дьиэҕэ туруоруллубут уопсай учуоттуур прибор көрдөрүүтүнэн оҥоһуллар. Бэс ыйын саҥата «Жатай» куораттааҕы уокурук дьаһалтатын баһылыга Анатолий Кистенев бырабыыталыстыба бэрэссэдээтэлэ Евгений Чекинниин көрсүһүү кэмигэр, хомунаалынай өҥөнү прибор көрдөрүүтүнэн төлүүр быдан табыгастааҕын этэн, “СӨ ититии иһин хомунаалынай өҥө төлөбүрүн туһунан” уураахха уларытыы киллэрэр тоҕоостооҕун туһунан эппитэ.
Анивера АКИМОВА, «Саха сирэ» хаһыат, edersaas.ru