Дмитрий Коркин кэриэһигэр көҥүл тустууга норуоттар икки ардыларынааҕы XI турнир үһүс күнэ сытыы бырахсыылардаах хапсыһыыларынан баай буолла.
edersaas.ru
61 киилэлээхтэргэ финалга азербайджанец Ахмеднаби Гварзатилов уонна монгол Тувшинтулга Туменбилег күөн көрсүүлэрин күрэхтэһии биир бастыҥ хапсыһыытынан ааттыахха сөп. Урут-уруккуттан илиилэрин үчүгэйдик билсэр бөҕөстөр хара ааныттан, туох да кэтэҕэмэйдээһинэ суох, иэмэх мастыы эрийсибитинэн бардылар. Манна иккис түһүмэххэ Гварзатилов утарылаһааччытын өттүктээн түһэриитэ быһаарар оруолланна. Түөрт очукуонан сыаналаммыт бу ньымата киниэхэ күүтүлээх кыайыыны аҕалла — 8:4.
Бу ыйааһыҥҥа үһүс миэстэни саха бөҕөстөрө бэйэлэрин икки ардыларыгар быһаарыстылар. Дойду уолаттарга призера Айсен Потапов Семен Владимировы баһыйа тутта. Норуоттар икки ардыларынааҕы кылаастаах спорт маастара Ньургун Александров Николай Иванову сабырыйда.
Быйылгы түһүлгэҕэ Евгений Жербаев хаһааҥҥытааҕар да аһыллан туһунна. Туораттан көрүүгэ, 70 киилэҕэ диэри ыйааһыҥҥа утарылаһааччыларын барыларын бэрт кэбэҕэстик кыайталаата. Бэл олимпийскай чөмпүйүөн Сослан Рамоновы 8:0 ахсаанынан сабырыйда. Финалга монгол Бат-Эрдэнэ Бямбадоржу киһилээбэтэ. Итинэн Бурятия баатыра Дмитрий Коркин турнирыгар үһүс кыайыытын сурунна. 2016 сыллааҕы Олимпийскай оонньуулар кыайыылаахтара уонна призердара Сослан Рамонов итиэннэ Ихитор Наврузов (Узбекистан) үһүс миэстэҕэ таҕыстылар.
79 киилэлээхтэргэ түмүк хапсыһыыга Алания тустууга Кахабер Хубежты Грузияттан сылдьар Джумбер Квелашвилины тутуһуннарбата, түөрт очукуонан хотторон иһэн, иккис түһүмэххэ кимиилээхтик тустан, ыраас техническэй кыайыыны ситистэ. Итинэн 2010 сыллааҕы Коркин турнирын үрүҥ көмүһүгэр кыһыл көмүс мэтээли эбиннэ.
Боруонса иһин киирсиигэ турок Ислам Килич утарылаһааччытын азербайджанец Ибрагим Юсубовы киирдэ киирээт хаста да кулахычытан, аҕыс очукуонан биирдэ чорбойо түстэ. Ол эрээри Юсубов онтон улаханнык уолуһуйбут көрүҥэ суоҕа, салгыы бииртэн биир очукуону ылан, күөн көрсүүнү бэйэтин туһатыгар түмүктээтэ — 12:8. Иккис паараҕа эдэр тустуукпут Алексей Ефимов Азия чөмпүйүөнэ, призера, аан дойду чөмпүйэнээтин призера Унурбат Пуревжавы (Монголия) утары тугу да оҥорбото — 10:0.
92 киилэҕэ диэри ыйааһыҥҥа Европа чөмпүйүөнэ Артур Найфонов (Осетия) спорт үтүөлээх маастара Анзор Уришевы (Красноярскай) кыайда. Боруонса мэтээл иһин хапсыһыыга, тустууну сэҥээрээччилэр үөрүүлэригэр, эдэр бөҕөспүт Максим Толмачев уопуттаах Гурам Черткоевы (Крым) бастакы түһүмэххэ ыраастык кыайда. Эквадор тустууга Паредез Виллагомез монгол Лувсандорж Тургтохтохтуун туста сылдьан тобугун эчэтэн, салгыы тустартан аккаастанарга күһэлиннэ.
125 киилэҕэ диэри ыйааһыҥҥа Лондоннааҕы уонна Рио-де-Жанейротааҕы Олимпийскай оонньуулар призердара Комейл Гасеми кыайыылаах буолла. Иран бөҕөһө финалга дьаныардаах хапсыһыыга монгол Нацагсурен Золбоону 2:0 ахсаанынан сабырыйда. Үһүс миэстэ иһин киирсиигэ Бурятияттан норуоттар икки ардыларынааҕы кылаастаах спорт маастара Балдан Цыжипов Олег Болтины (Казахстан) баһыйа тутта — 8:1. Оттон Белоруссияттан сылдьар Бразилиятааҕы Олимпиада үрүҥ көмүс призера Ибрагим Саидов Казахстан тустуугун Ермукамбет Инкары сабырыйда — 2:0.
Роман Попов, edersaas.ru
Ааптар хаартыскаҕа түһэриитэ