Аныгы кэм Золушката: остуоруйаттан хобдох олох

Ааптар: 
Бөлөххө киир:

Оҕо сааспыт остуоруйаларыгар үтүө сыһыан, кырдьык куруук кыайалларыгар, атаҕастаммыт-баттаммыт куруук дьолун булан, олоҕо көнөрүгэр үөрэммиппит. Оттон дьиҥ олоххо остуоруйаҕа курдук буолбатах — көйгөтүллүбүккэ күн тыгара ахсааннаах. 

edersaas.ru

Дьокуускай куоракка полиция сокуоннай саастарын ситэ илик оҕолор дьыалаларыгар иниспиэктэрдэрэ бэрэбиэркэлэрин түмүгэр, 14 саастаах кыыһы дьиэлээхтэрэ атаҕастаан олороллоро биллибит.

Кыыс кыратык да сыыһа тутуннаҕына, тута кырбанан иһэр эбит. Аны аҕатын, маачаха ийэтин, ол дьахтар кыргыттарын кытта биир остуолга олорон аһыыра бобуллар. Үксүгэр, күнүскү уонна киэһээҥҥи аһылыктан матараллар. Инньэ гынан, оҕо куруук аччык сылдьаахтаабыт.

Таҥастарын таҥас сууйар массыынаҕа сууйара көҥүллэммэт. Күннээҕи эбээһинэһигэр «водокачкаттан» 25 литрэлээх 2-3 бөтүөнүнэн уу таһыыта киирэр эбит. Аны туран, өскөтүн кууруссалар аҕыйаҕы сымыыттаатахтарына, «эн сиэбиккин» диэн маачахата накаастыыр эбит.

Ону ааһан, бу кырыктаах дьахтар бэйэтэ хонтуруоллаан туран, оҕо эрэйдээҕи мас скалканан кыргыттарынан уонна аҕатынан оҕустарар-кырбаттарар эбит. Уочаратынан. Төһө да ытаатын-хаһыытаатын, маачаха тохтото илигинэ, саараама, тохтоон да бэрт, кырбаабыттарын курдук кырбыы тураллар.

Оскуолатыгар кыыһы үчүгэйдик сыаналыыллар. Ол эрэн, таҥаһа-саба мөлтөҕүн, канцелярскай тэриллэрэ суоҕун, дьиэтиттэн ас хаһан да аҕалымматын, оскуола остолобуойугар аһаабатын, аҕата буолуохсут төрөппүт мунньаҕар биирдэ эрэ сылдьыбытын бэлиэтээбиттэр.

Дьокуускай куорат полициятын 3 №-дээх отделын дознаниеҕа салаата бу чахчынан РФ Холуобунай кодексатын 156-с ыстатыйатынан холуобунай дьыала тэрийдэ. Ол эбэтэр, сокуоннай сааһын ситэ илик оҕоҕо кырыктаахтык сыһыаннаһан туран, иитэр эбээһинэстэри толорбот буолуу бэлиэтэ баарынан.

Кыыс аҕата төрөппүт буолар бырааба быһыллыбыт, маачахата бэйэтин аатынан суруттарбыт докумуона көтүрүллүбүт. Кыысчаан аймаҕар олорор.

Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0